諗住返深圳睇醫生?呢個貼文幫到你!

港人北上求醫最強攻略，快啲收藏！

提前準備

點樣買深圳醫療保險？（俗稱醫保，係深圳社保五大類嘅其中一種）

一、辦理港澳台居民居住證（簡稱｢居住證｣，要喺深圳辦理，用靈活就業形式買醫保要有居住證，回鄉證買醫保要有公司任職）

1. 有乜要求？——要喺深圳居住半年以上（要喺居住嘅社區網格度做登記），或者自己/父母喺深圳有樓。

2. 網上點申請？——點擊下面｢深圳公安｣公眾號——｢政務服務｣——｢港澳居民服務｣——｢戶政業務｣——｢港澳台居民居住證申領預約｣預約辦理，按預約日期帶埋以下資料文件去公安局申請辦理，查詢電話0755-84465000：

   (1) 證件相+相片回執（要喺深圳影證件相，如果已經有電子相嘅可以自己上網整相片回執，不過最好都係直接去到現場影證件相同埋攞相片回執）

   (2) 有效期內的回鄉證（正本+影印本）

   (3) 居住滿半年的證明（包括房屋產權證明文件、房屋租賃合約、居住社區或物業管理處開立嘅居住證明、境外人員臨時登記表、僱傭合同、就業證明、就讀學校證明、學生證等，以上任何一種均可，要留意證明文件嘅蓋章日期盡量係1個月之內）。16歲以下兒童需要法定代理人（一般係父母）代辦，要帶埋法定代理人嘅回鄉證正本同影印本，如果16歲以下兒童無法親自到現場，要帶埋出生證明文件正本同影印本。

交齊所有資料文件，現場填寫申領登記表，驗證手指紋就完成啦。辦理時間大概需要10個工作日，攞證可以揀自己到現場攞或者速遞，速遞費由申請人喺收到證件個時俾錢，預計大概18元人民幣。

二、要用居住證喺深圳開一個銀行戶口（如果之前用其他證件開過銀行戶口，可以直接去銀行將登記證件改成居住證）

1. 先用居住證開張深圳電話卡，一般喺口岸過關後可以直接辦理（慳錢方法：一開始上台個陣可以先隨便揀個plan，第二個月開始喺電訊公司APP入面搵人工客服將個plan轉成8元/月嘅保號套餐）。

2. 用居住證同埋深圳電話卡去任何一間銀行開戶。

三、申請醫保（網上辦理）

由於深圳社保改革，取消咗二檔社保，香港居民個人靈活就業淨係可以購買一檔社保。喺｢深圳社保｣公眾號——｢便民服務｣——｢業務辦理｣——｢靈活就業登記和參保登記｣，簽訂醫保自動繳費協議，一般每個月20號左右會自動喺你銀行戶口繳費，唔使自己操作。

四、申請並領取金融社保卡（要喺深圳辦理）

1. 收到醫保辦理成功嘅短信後七個工作日以及銀行戶口第一次自動扣費成功後，喺微信度search｢深圳社保｣公眾號——｢便民服務｣——｢辦理金融社保卡｣，港人用居住證可以網上申請的銀行唔多，根據自己情況選擇就得。深圳只有農業銀行同交通銀行係可以申請完即時攞金融社保卡，其他銀行都要申請完再等幾日先去攞卡。

2. 收到短信通知金融社保卡辦理成功後，帶埋居住證、回鄉證，去銀行攞卡就得，攞到之後記得喺｢深圳社保｣公眾號——｢便民服務｣——｢辦理業務｣——｢社保卡管理｣——｢社保卡功能管理｣及時激活個張卡嘅社保功能同金融功能。

五、綁定社康中心（網上辦理）

喺微信search｢深圳醫保｣公眾號——｢掌上政務｣——｢掌上辦事｣——｢辦事｣右邊的｢查看更多｣——｢基層選點｣——｢普通門診統籌定點基層醫療機構選定/變更（基本醫保一檔）｣——進入後進行社康中心綁定，只需要變更到一間醫院下面的其中一間社康中心即可實現N（呢間醫院下屬的所有社康中心）+1（呢間醫院）的醫療服務。特別注意：第一次綁定社康中心會即時生效，後面再變更要等到下個月1號先生效。以下12家市屬三甲醫院冇下屬社康中心。

點樣搵到適合自己的醫療機構同埋醫生？

一、普通疾病優先選擇社康中心-全科醫生

1. 深圳實行分級診療制度，如果係普通情況（感冒、發燒、咳嗽、肚痾等）、基礎性疾病（高血壓、高血糖、高血脂、高尿酸等）、常規檢查（驗血、驗尿等）或者中醫理療，建議可優先選擇社康中心就醫。

2. 喺微信小程序search｢社康通｣選擇鄰近社康中心，最好選擇比較新的社康中心，環境好，設備新。社康中心籌號充足，可提前網上預約籌號，亦都可以去現場拿即日籌掛號。

3. 去社康中心睇醫生嘅好處：籌號充足，掛號簡單、費用又平（掛號10元人民幣），檢驗、檢查、治療快，排隊時間短，出報告又快，效率高，仲可以簽約家庭醫生，加家庭醫生嘅微信，有乜問題可以直接通過微信同家庭醫生溝通查詢。

4. 去社康中心睇醫生唔好嘅地方：有啲社康環境和設施比較舊，醫生水平有好有壞，同埋有啲比較好嘅藥物社康中心冇，醫生一般會建議你自己去出面藥房購買。

Tips：

1. 如果有深圳醫保，記得提前綁定社康中心，先可以提高醫保報銷比例。
2. 可直接同社康中心嘅全科醫生提出自己要做咩檢查，開咩藥。如果介意醫生開中成藥俾你，要提前同醫生講。
3. 如果想喺三甲醫院做全身麻醉胃腸鏡檢查，可以喺呢間醫院下屬嘅社康中心掛號叫醫生開預約檢查單，然後轉診去呢間醫院做檢查，唔使再去呢間醫院掛號預約（前提係呢間醫院要有下屬社康中心）。

二、複雜問題選擇三甲醫院-專科醫生

1. 如果係比較嚴重或者疑難雜症，建議選擇三甲醫院，掛專科醫生嘅籌號。依家深圳全部醫院除咗急診可以現場掛號，其他全部都實行預約掛號，全部要提前預約，深圳大部分醫生嘅號提前預約都可以約到。只有部分好熱門嘅醫生先好難掛號，需要網上搶籌號，一般提前一個星期留意醫院公眾號派籌規則，調好鬧鐘提前幾分鐘入去搶籌號主頁，亦可以試下直接去個醫生診室門口排隊等向醫生申請加號，不過醫生唔一定同意加號，如果同意加號，要等前面啲病人全部睇曬先輪到你，記得預留充足等候時間。

2. 如果有心儀嘅醫院，喺微信search｢醫院個名｣，例如香港大學深圳醫院，search佢個公眾號，點擊｢預約掛號｣，綁定就診人信息，建就診卡，選擇想睇咩科、醫生同適合的時間段預約掛號。

3. 如果唔知邊個醫生啱自己，可以喺｢就醫160｣公眾號——｢就醫服務｣——｢掛號｣，輸入醫院名稱，選擇科室-醫生，瀏覽每個醫生擅長嘅範疇，以及患者評價，選擇啱自己疾病範疇同患者好評比較多嘅醫生，進行預約掛號。

4. 如果係第一次就醫，建議選擇合適科室的普通醫生掛號就得，因為一般第一次就醫都要開單做檢查檢驗，普通醫生掛號費比較平，排隊時間比較短，如果檢查結果有比較大問題，或者要複診，建議再揀更高級別嘅醫生掛號就醫。

Tips： > 1. 喺｢就醫160｣公眾號預約掛號，雖然可以了解其他就醫病友對醫生嘅評價，幫助提前了解同選擇適合自己嘅醫生，不過通過｢就醫160｣公眾號約咗籌號後，仲要喺就醫當日去醫院現場繳費攞號，會有啲唔方便。如果想喺就醫當日節省時間，可以喺｢就醫160｣公眾號揀好醫生後，喺微信search呢個醫院嘅公眾號來直接網上掛號、繳費同網上攞號，唔使再喺現場繳費攞號。兩者之間有區別。 > 2. 除咗以上2种掛號方式，你仲可以喺微信search｢健康深圳｣公眾號——｢預約掛號｣選擇社康或者醫院預約掛號，或者通過支付寶search｢醫療健康｣選擇醫院預約掛號。如果要睇急症，仲可以直接去醫院現場嘅自助機或者人工櫃檯掛號。 > 3. 如果確實唔知點揀醫生，建議可以參考｢深圳衛健委｣公佈的｢第三屆好醫生名單｣，不過名單入面啲醫生可能比較難掛號，如果實在掛唔到號，亦可以考慮揀呢個醫生所屬團隊嘅其他醫生。

點樣查詢藥品或者檢查項目嘅收費標準？

1. 喺微信search｢深圳醫保｣公眾號——｢掌上政務｣——｢醫保價格通｣，就可以check唔同醫療機構藥物、耗材、檢查項目嘅報價啦，不過具體收費仲係要視乎醫院實際收費，只作為參考。

1. 喺微信search｢醫院名稱｣，點擊進入醫院主頁，可以進行｢物價查詢｣，有啲醫院會公佈收費標準，可以通過關鍵字來搜，例如搜｢腸鏡｣來查詢價格。有啲醫院冇網上公佈收費標準，亦可撥打醫院電話來進一步了解，或者去醫院服務櫃檯查詢。

睇醫生當日需要準備乜嘢？

1. 證件：回鄉證或者港澳通行證。
2. 繳費工具：現金（人民幣）或網上繳費工具（支付寶、微信等）。
3. 過往病歷、檢查檢驗報告：如果喺同一間醫院複診，醫生電腦入面會有你嘅檔案，可以唔帶。
4. 其他證件：如果有購買深圳醫保，要帶埋金融社保卡。

就醫

去到醫院點樣攞號簽到？

如果你係直接喺醫院公眾號預約掛號，可以直接喺公眾號上面繳費攞號，如果係通過其他方式網上掛號，就要喺就醫當日提前至少半個鐘到達醫院，喺醫院自助機或者人工櫃檯攞號（要提供證件或者金融社保卡）。攞號之後，會有個slip俾你，之後將slip交去指定科室嘅分診台簽到，然後坐低等叫號就得。如果當日遲到過咗攞號時間，即時去搵分診台嘅姑娘溝通，重新排隊。

點樣先可以同醫生快速溝通你的病情或者診療需要？

深圳醫生睇一個病人嘅時間好短，一般得幾分鐘時間。點樣先可以喺短短幾分鐘之內將自己嘅情況、診療需要同醫生溝通清楚，非常關鍵，亦決定咗醫生嘅診斷、你就醫嘅體驗同診療嘅效果。因為涉及具體溝通細節，篇幅太長，你可以點擊下面條link瀏覽我地之前嘅PO文，希望可以幫到你。

點樣繳費？

1. 如果你有深圳醫保，同埋已經綁定咗醫院就診卡和醫保卡，可以喺收到醫院公眾號發送嘅收費通知後，直接喺公眾號入面選擇醫保繳費。
2. 可以用微信scan繳費單（或者處方單、治療單等）左上方QR Code進行網上繳費，可選擇自費或者醫保繳費。
3. 如果你想醫院現場繳費，建議你直接去人工櫃檯辦理。因為有啲繳費項目喺醫院自助機繳費嘅話唔可以用醫保報銷。
4. 現金嘅話，只能人工櫃檯繳費。

點樣提高就醫效率？

1. 醫生開好檢查單後，應及時繳費，然後及時去指定嘅檢查檢驗地方，將檢查單交俾分診台姑娘簽到，然後排隊等候叫號。如果同時有好多張檢查單要排隊等候，可以先去各個分診台簽曬到，然後問下姑娘每個檢查大概要排几耐隊，揀排隊快嘅先做檢查，做完即刻去下一個檢查項目，節省時間。
2. 做完檢查可以順便問下几時出報告。有啲檢查檢驗報告唔使等print紙質報告，醫生電腦度可以直接睇到。你計下時間差唔到出報告，就提前去醫生診室，搵分診台姑娘攞個睇報告嘅回診號（一般醫院睇報告都要攞回診號），等候叫號。只要攞到回診號，醫生就算到咗放工時間，佢地都會睇埋你個報告先走，咁樣可以節省好多時間，亦可以避免等print完報告去搵醫生但醫生已經放工嘅情況出現。依家大部分醫院嘅公眾號都可以直接睇檢查檢驗電子報告，或者睇X-RAY膠片等，可以留意查詢公眾號。
3. 請注意！各個檢查檢驗報告有效期為3日（包括出報告當日），有效期內可通過自助機或者去分診台攞回診號複診，每次掛號只可以攞1次回診號。如果超過3日有效期，要重新掛號先可以複診。
4. 搵完醫生睇報告後，如果開咗藥，要求定期複診，可以喺診療結束後問下醫生複診時間，提前約好號，尤其係難掛號嘅醫生，一般情況下，醫生都會同意加號俾你複診。

如果你喺深圳就醫遇到溝通方面或者流程方面嘅問題，需要專業陪診師陪你就醫，可以提前12個鐘喺微信小程序｢91陪診｣預約，預約之後陪診師將協助你進行掛號，與你溝通具體服務細節，幫助你快速就醫。

如果你唔方便直接過深圳睇醫生，希望節省時間提高就醫效率，可以提前12個鐘喺微信小程序｢91陪診｣預約代問診服務，由專業陪診師代你前往醫院同醫生溝通你幫嘅病情，如果醫生同意，仲可以同你視頻診查，幫你開藥、預約好檢查或者開立住院通知書，具體服務內容同收費可以點擊下面條link查詢：

如果您有任何疑問，都可以添加以下｢91陪診｣官方客服微信，進行咨詢，歡迎體驗我哋嘅專業陪診服務。